Maður með mönnum og sigrar dagsins.

Sæl Blogga.

Ef ég er ekki orðinn flottur.......þá hvað!?!?  Satt best að segja maður með mönnum!  Ég á orðið 3 bloggvini og það er nú alls ekki svo slæmt.  Góð þreföldun úr engu.  Mér sýnist reyndar sumir bloggarar eiga miklu fleiri vini en ég.  Eiginlega alveg rosalega marga vini, en við erum ekkert að súta það Blogga.  Við bara höldum áfram tengslamynduninni hér í netheimum og sjáum hvort við eignumst ekki fleiri vini.

Í dag voru unnir stórir sigrar og öllu minni sigrar.  Einn af stórsigurinn verður að teljast sá að komast niður um 13,5 cm í verkefnastaflanum á skrifborðinu.  Þar kom nú ýmislegt við sögu svo sem: flugslysaáætlun fyrir Reykjavíkurflugvöll, flugverndarmál í Reykjavík og á Akureyri, flugslysaæfingar fyrir norðan og vestan, aðgangsheimildir flugvalla, útboðsmál og flugslysaáætlun fyrir Kosovo.  Sem sagt bara afkasta mikill dagur í vinnunni.

Þeir voru öllu minni sigrarnir í hreyfingunni.  Reyndar fór spretthlaupataskan með í bílinn í morgun en hið ótrúlegasta gerðist.  Töskunni var stolið úr bílnum skömmu fyrir hádegi, akkúrat þegar ég var að fara að nota hlaupabúninginn, en svo var búið að skila henni aftur þegar ég lagði af stað heim.  Ótrúlegt hvað aðrir eru tilbúnir að leggja á sig svo ég geti ekki farið út að hlaupa!  En ég læt ekki stoppa mig svo glatt.  Ég tek töskuna með á morgun og fel hana bara undir sætinu.

Upphafið á enda dagsins var svo fjölskyldu skemmtun og grill í Sjálandsskóla hjá Elfu.  Hoppukastali, stultur, kajakar og fullt af skemmtilegu fólki.  Þetta fannst Birgi ekki leiðinlegt og miðað við alla steinana sem hann afrekaði að kasta út í sjó má vænta þess að yfirborð sjávar hafi hækkað um einhverja sentimetra.  Ef þetta verður að áhugamáli hjá honum er eins gott að við búum í u.þ.b. 100 m.y.s.

Mér sýnist síðan að kvöldið stefni í þennan líka fína rómans.  Nú sitjum við hjónin við eldhúsborðið með sitt hvora fartölvuna fyrir framan okkur.  Elfa að vinna námsmat fyrir nemendur sína og ég að spjalla við þig Blogga mín.  Lof sé því að við lifum á tækniöld.

Með sigur kveðju.

Árni (spretthlaupari)

Athugasemdir

[Snjólaug Systir þín (IP-tala skráð) 30.5.2007 kl. 12:59]

Blessaður uppáhalds stóribróðir minn.  Það er ekkert verið að tilkynna fjölskyldunni að við getum fengið að lesa skemmtilega pistla eftir þig á veraldarvefnum.  Sem betur fer fann ég síðuna alveg sjálf og mun setja hana inn í favorites bendi líka á hugsanlegan bloggvin www.gudlaugur.blog.is

Svo er ég sammála við þurfum að fara að skipuleggja útileigu að minnsta kosti eina ef ekki tvær fyrir sumarið.

Kveðja  til heimilisfólksins

Snjólaug