Sveitin og stórborgin

Sæl frú Blogga.

Jújú þetta var nokkuð hefðbundinn dagur, nema ef vera kynni sú ótrúlega staðreynd að ég fór annan daginn í röð út að hlaupa með honum Rögnvaldi.  Ég prísa mínu sæla að hafa verið öllu brattari en í gær.

Trúlega verður þó helsta afrek dagsins að teljast það þegar ég safnaði í mig kjark og hikandi skrifaði inn athugasemd á heimasíðuna hennar Sóleyjar frænku.  Ekki það að ég óttist hana frænku mína, heldur öll ókunnugu ljónin sem keppast við að skrá þar inn athugasemdir og skiptast svo á að rífa hvert annað í sig.  Þarna eru stóru bloggararnir á ferð.  Við skulum líka átta okkur á því, Blogga mín, að þetta er engin miðlungssíða.  Hér erum viða að tala um síðu sem er í 8. sæti yfir vinsælustu bloggsíðurnar á Mogga blogginu með tæpar 9000 heimsóknir á viku.  Jú reyndar er síðan hennar ekki sú vinsælasta, en má ég þá biðja um róttækar femínískar skoðanir frænku minnar en hugaróra stúlkunnar sem heldur úti vinsælustu síðunni, og það með tæpar 25.000 heimsóknir á viku.  Ég kannaði málið Blogga mín og við náum ekki einu sinni inn á topp-400.  Þetta er svona eins og munurinn á hraðri og fjölmennri stórborg og rólegum sveitabæ.  En Blogga mín við höfum það nú bara notalegt hérna í sveitinni.  Kíkjum svo bara í skoðunarferðir í stórborgirnar en höldum okkur ella heima í sveitinni.  Eða eins og Svíinn myndi orða það: Borta bra, menn hemma best.

Með sveita kveðju.

Árni

Athugasemdir

[Sóley Tómasdóttir (IP-tala skráð) 1.6.2007 kl. 08:05]

Iss, þið Blogga munið rjúka upp vinsældalistann á örskotstíma... bara halda áfram og þið verðið komin í iðandi mannlíf borgarinnnar áður en þið vitið af. Bestu, Sóley frænka!