Aðgerðalítið á vesturvígstöðvum

Sæl Blogga.

Ekki seigi ég nú að það  sé mikið í fréttum og gengur lífið sinn vana gang.  Mánudagurinn var einkar hefðbundinn.  Vinna - sofa - éta.  Þriðjudagurinn var það í sjálfu sér líka nema hvað í ljósi þess að sjávarútvegsráðherra ákvað að auka humar kvótann (væntanlega til að bæta upp fyrir þorskinn) ákváðum við hjónin að sýna stuðning við þessa ákvörðun Einars og drógum fram humar.  Já svona getur maður leyft fiskveiðistjórnunarkerfinu að hafa skemmtileg áhrif á matseðil heimilisins.  Mamma og Arnþór sýndu einnig stuðning sinn við fiskveiðistjórnunarkerfið í verki og hjálpuðu okkur við að torga humrinum.  Birgir var reyndar hrifnari af upphituðum grjónagraut en humarhölunum.  Hann skilur greinilega ekki mikilvægi þess að heimilin í landinu styðji við fiskveiðistjórnunina í verki.  Nú vona ég bara að þeir fari ekki að tilkynna um auknar aflaheimildir á loðnu.

Eftir vinnu, í dag, fórum við feðgarnir í heimsókn til Steinunnar Ernu og Co.  Þar sannaðist að hjarta Birgis er lítt stærra en hjarta föður hans á svipuðum aldri.  Steinunn Erna hafði fengið forláta andlistförðunar sett, sem hæfir 2 ára stúlkum, og mátti til með að sýna frænda sínum herlegheitin.  Ekki lítið flott sett, sem var þannig búið að þegar þrýst var á hnapp lyftist lokið, spegill birtist og skúffa með öllu förðunardótinu dróst út.  Birgi fannst þetta stórfenglegt og sannprófaði ítrekað virkni opnunar hnappsins.  Þá var komið að því að Steinunn sýndi Birgi til hvers ætti nú í raun og veru að nota þetta fínerí.  Hún dreif fram rauðan varalit og renndi honum fimlega um varirnar.  Árangur kom fljótt í ljós þar sem neðrihluti andlits hennar varð brátt orðinn fagur rauður.  Það skipti engum togum að Birgir varð skelfingu lostinn.  Hann greip báðum höndum um munninn á sér og flúði í fang föður síns.  Það var ekki fyrr en búið var að þrífa Steinunni í tvígang í framan (hún var svo sem ekki á því að gefast upp við að gera sig fína þó svo að frændi hennar kynni ekki að meta fallega málaðar stúlkur) að Birgir fékkst með semingi að losa hendurnar frá munninum og hætti sér í leik.  Kvöldið var svo klikkt út með framandi kvöldverði á norður-amerískum veitingastað í Hafnarfirði.  Já Blogga maður var bara grand og bauð fjölskyldunni út á borða á KFC og fékk prik fyrir.  Nema hvað.

Með kvótakveðju.

Árni

Athugasemdir

[Sóley Tómasdóttir (IP-tala skráð) 8.6.2007 kl. 14:14]

Á undanförnum 33 árum hef ég lært að ég má ekki vera vond við Pálu. Er ekki viss um að Steinunn verði ánægð með þig núna...

[Árni Birgisson, 8.6.2007 kl. 15:58]

Blessuð vertu þetta er allt í lagi.  Ég held / vona að Pála kunni ekkert á þetta bloggerí.

[Sóley Tómasdóttir (IP-tala skráð) 9.6.2007 kl. 09:57]

Þessi athugasemd átti að sjálfsögðu að vera við næstu færslu fyrir ofan - úr máli í myndir.

[Árni Birgisson, 9.6.2007 kl. 22:12]

Veit ég Sveinki.