Birgir lasinn og gæsin horfin

Sæl frú Blogga.

Vorið kemur með Lóunni og haustið með hori í nösum barnanna.  Þannig að þetta var fyrsti dagurinn heima með veikt barn.  Biggi bar sig vel og var í raun hæst ánægður með að vera heima og láta dúlla við sig.  Hann áréttaði það reglulega með brosi á vör að hann væri lasinn og ætti að fá að vera heima.  Með engum fyrirvara ákváðum við Halldór að halda til heiðargæsaveiða.  Reyndar vorum við í allra síðasta lagi að leggja í hann klukkan rúmlega fimm.  Eftir að hafa tankað í Hrauneyjum var haldið inn á Búðarháls milli Þjórsár og Tungnár.  Þökk sé nýlegri brú létum við okkur nægja að virða fyrir okkur lúinn kláfinn sem augljóslega ber þess merki að hafa þjónað mörgum ferðalanginum.  Þegar inn á Hálsinn var komið voru víða komnir snjóskaflar á veginn og ekki jók það tiltrú okkar á árangur ferðarinnar.  Enda kom það fljótt í ljós vötn voru frosin og gæsin trúlega búinn að kveðja svæðið þetta árið.  Það var þó sárabót að ónefndur fugl flaug í veg fyrir hlaupið þegar við tókum æfingarskot og því komum við ekki alveg tómhentir heim, en það var alveg óvart.  Þannig að veiðiferðin varð meira svona 6 tíma bíltúr, sem ekki þarf að kvarta undan þegar félagsskapurinn er góður.

Með gæsa kveðju, Árni

Athugasemdir

[Sóley Tómasdóttir (IP-tala skráð) 27.9.2007 kl. 17:03]

Hmmm... Er ráðlegt að blogga um ónefnda fugla sem fljúga fyrir æfingaskot? -Á opinberum og víðlesnum síðum? -Hvenær er annars næsta partí?

[Árni Birgisson, 27.9.2007 kl. 22:58]

Sóley. Á þessari síðu er birtur sannleikurinn, allur sannleikurinn og ekkert nema sannleikurinn svo hjálpi mér.......

Engu er skotið undan.  Ekki einu sinni fuglum.

[Herdís Sigurjónsdóttir, 6.10.2007 kl. 17:23]

Elsku frændi þú getur nú ekkert gert að því að verða fyrir því að hitta á fugla sem eru í sjálfsmorðshugleiðingum .... Hann Elli minn er úti á palli að reita gæsir ... hann á bara 20 eftir